Էկոլուրի անդրադարձը՝ Սարալանջի աշխույժից

Այսօր՝ սեպտեմբերի 27-ին, սեբաստացիները հացով և գինիով նշեցին Սարալանջի տաղավարի բացումը։ Մինչև Սարալանջի այգու աշխատանքների ավարտը, որը նախատեսված է հոկտեմբերի 10-ին, ամեն օր կկազմակերպվի այգում աշխատող վարպետների ընդմիջումը՝ ավանդական բրդուճների հյուրասիրությամբ և ազգային երգուպարով։

Կրթական պարտեզ՝ իմ արվարձանում

Փարաքարի Շառլ Ազնավուր փողոցի մի հատվածում արդեն վայելում ենք կրթական պարտեզում աճեցված խաղողի պտուղը։ Այն աճեցրել և խնամում է իմ ընտանիքը, սակայն հողատարածքը պատկանում է ուրիշին, իսկ արդեն խաղողի բերքը՝ թաղամասի բնակիչներին և անցորդներին։ Արդեն պատկերացնում եմ, թե ինչ գեղեցիկ թաղամաս կլինի, երբ աջից ու ձախից ձգվեն խաղողի վազերը։ Հարևաններից մի քանիսը տեղեկացված են «Կրթական պարտեզ բնակելի արվարձանում» և «Կանաչ ցանկապատ» նախագծերին և ոգևորված։ Նրանց ներգրավմամբ կիրականանա «կանաչ» թաղամաս ունենալու երազանքը, իսկ փողոցը արժանի կդառնա իր անվանը։ Նման փողոցում ապրող բնակիչներին միասնական խաղողից գինի պատրաստելու գաղափարը կջերմացնի ու կմիավորի  նոր, առաջադեմ գաղափարների շուրջ։

 

 

Կրթական էկոլոգիա՝ ճամբարային մեկ առօրյայում

Ճամբարը ստացված ֆիլմ է՝ առանց սցենարի։ Վերցրու տեսաձայնագրիչդ, նկարիր օրվա ինքնաբուխ աշխատանքները ու կհայտնվես ամենահետաքրքիր միջավայրում, կբացահայտես կրթական պարտեզի կրթական նշանակությունն ու ազդեցությունը թե՛ փոքրի և թե՛ մեծի վրա։

Առավոտյան ճամբարի հետ մարզական ներքնակներն էինք լվանում։ Կրթական պարտեզում  այգեպան Հովհաններսն ու Էդգարն էին՝ իրենց օգնական ճամբարականներով։

Աշխատանքից հետո կարատեի պարապմունք, որն ինձ համար բացահայտում է լիարժեքության ու կատարելության ներքին էկոլոգիան։